Om diep asem te haal klink so eenvoudig en holisties en die idee aanvanklik was om dit slegs een keer per dag te doen, soggens wanneer jy wakker word, nog voor jy uit die bed klim. Een keer lekker diep asemhaal en dan is jy reg om die dag aan te pak.
Maar hoe verkeerd was ek nie, want …. een keer per dag was hopeloos te min, die diep asemhaal was te vlak of te diep, te smal of te wyd om die hele dag te dek. Ek doen dit net nie reg nie, was my eerste gedagte, maar ek het gou agtergekom die grootste oorsaak vir die mislukkig van ‘n eenvoudige aksie het dieper gelê as net binne my, dit was by die toestel reg langs my bed terwyl ek diep asemhaal – my selfoon.
Die selfoon is ‘n wonderlike ding, sonder hom kan jy nie meer lewe nie, (My pa kry dit wel heel goed reg), dit is jou kontak met elke lewende wese buitekant jou huis se vier mure en as jy hom binne daardie vier mure nodig het, is hy ook daar.
Waarom is die selfoon dan ‘n probleem? Die foon self is nie die probleem nie, kom ons sê maar net die wi-fi is. Dis ‘n fantastiese voorreg, die wi-fi, veral in ‘n woonkompleks, dis sommer deel van jou heffingbydrae, en woeps, jy is heeldag (en nag) aanlyn, gereed vir alles wat jy moet weet in 24 uur se tyd, byderhand, net daar op die foon langs jou. En jy hoef nie heeltyd jou data op te top nie.
Kom ek verduidelik … ek bly in ‘n pragtige bolandse dorp in die Wes-Kaap. In ‘n woonkompleks naby heelwat winkels en skole, hoofstrate net af in die pad en als waaraan jy kan dink om nodig te hê. Ongelukkig kom daar saam met al hierdie geriewe ook probleme, en mense, heelwat van hulle in ‘n spasie wat jy moet deel tesame met vele viervoetige vriende, en ‘n hele klomp geveerdes. Dit klink mos nou net na ‘n lekker gemeenskap, so in die mooi omgewing, omring deur eindelose berge en besonderse sonsondergange. Wat, tesame met ‘n foon met ewigdurende wi-fi kan dan nou die rustigheid bederf wanneer jy jou diep asemhaal wil beoefen?
As jy nog nie jou diep asemhaal gedoen het vir die dag nie, moet jy asb nie wag tot na half ag in die oggend nie, stel jou foon ook in om voor daardie tyd die takie afgehandel te kry. Want as jy wag, selfs net ‘n minuut langer, sal die gepiep van die foon jou gruwelik onderbreek. En dan begin dit, klagtes oor toegangsbeheer agv die son wat van agter op die skermpie skyn en jou gesig onherkenbaar maak en jy nie kan uit nie, die baklei met ‘n onvriendelike sekuriteitswag wat jou al vir vier jaar ken en elke dag sien, maar vandag sal jy nie by daai geel ‘boom’ verby nie, want jou gesig wil nie vanoggend scan nie. Die boodskappe vlieg heen en weer op die whatsapp groepe, van formele kommunikasie oor na die informele groep waar jy effens meer kleurryke taal kan gebruik. Teen die middag praat almal oor die swak verf en bouwerk en wat hulle als self moet regmaak aan ‘n huis wat twee jaar gelede klaar gebou is, en teen die aand klim almal weer op die wa oor trustee besluite en Zoom vergaderings, hondebol wat nie opgetel is nie, ens.
En dis net vir een dag …. Die oplossing vir my dilemma? Daar is vele, eerstens, klim net af van die whatsapp groep asb.
Maar uiteindelik - Sit die foon se klank af en … haal diep asem.
